ՌԱՄԱ կիրառման բիզնես օրինակ՝ «Մագնոն» ԲԲԸ
«Մագնոնը» կոնստրուկցիոն մետաղական ապրանքների արտադրող է: Հիմնադրվելով 1998 թվականին սեփականաշնորհված ձեռնարկության հիմքի վրա՝ ընկերությունը ձևափոխել է նախկինում գոյություն ունեցող աշխատանքային տարածքը (սարքավորումներ, գործիքներ և ենթակառուցվածքային տարրեր, ինչպիսիք են շենքերը, ջրամատակարարումը և էլեկտրաէներգիայի համակարգը) և այն օգտագործում է որպես արտադրական տարածք: Ցավոք սրտի, ընկերության օբյեկտները համարվում են հնացած և կարիք ունեն կա՛մ վերանորոգման (շենքեր և պահեստային տարածքներ), կա՛մ փոխարինման (օդափոխության համակարգ, ջրամատակարարման ենթակառուցվածք): Սարքավորումները անսարք են կամ չեն վերանորոգվում՝ զբաղեցնելով աշխատանքային տարածքի մեկ երրորդը։ Ավելին, պատշաճ ջեռուցման և ջերմամեկուսացման բացակայության պատճառով ընկերությունը չի կարողանում աշխատել ձմռանը։ Էներգաարդյունավետության և իր անձնակազմի բարեկեցության խնդիրների լուծման շարժառիթներով ընկերությունը մասնակցել է ՌԱՄԱ ցուցադրական նախագծին «Կանաչ տնտեսություն Արևելյան գործընկերության տարածաշրջանում» (EAP Green)-ի շրջանակներում (2019-2024): Այս հրապարակումը ցույց է տալիս ընկերության փորձը, որը զեկուցվել է 2022-2023 թթ. իրականացված մոնիթորինգից հետո։
ՌԱՄԱ գնահատումը ուսումնասիրել է արտադրական տարածքը և բացահայտել ՌԱՄԱ տարբերակներ, որոնցից ընկերության կողմից առաջնահերթություն է տրվել հետևյալ հինգին, որոնք միջինից բարձր ծախսատարության առաջարկություններ են։
ՌԱՄԱ տարբերակ 1։ Աշխատակիցների շրջանում էներգաարդյունավետ վարքագծի ձևավորում։ Այս միջոցառումը կօգնի վերապատրաստել անձնակազմին, հատկապես գիշերային ժամերին, էլեկտրաէներգիայի սպառումը նվազեցնելու համար:
ՌԱՄԱ տարբերակ 2։ Շրջակա միջավայրի, առողջության և անվտանգության (ՇՄԱԱ) կառավարման համակարգի և պլանների մշակում և իրականացում:
ՌԱՄԱ տարբերակ 3։ Ինֆրակարմիր ջեռուցման համակարգի (ԻԿՋՀ) տեղադրում։ Այս միջոցառումը կապահովի էժան և արդյունավետ ջեռուցում աշխատանքային տարածքի համար:
ՌԱՄԱ տարբերակ 4։ Ֆոտովոլտային (ՖՎ) արևային վահանակների և ԻԿՋՀ-ով ջրի ջեռուցման արևային համակարգի տեղադրում։ Այս միջոցառումը կնվազեցնի էներգիայի օգտագործումը և կապահովի ընկերության էներգետիկ անկախությունը էլեկտրական ցանցից, կամ
ՌԱՄԱ տարբերակ 5։ Ֆոտովոլտային (ՖՎ) արևային վահանակների և արևային ջրի ջեռուցման համակարգի տեղադրում առանց ԻԿՋՀ:
