ՌԱՄԱ կիրառման բիզնես օրինակ՝ «Սնեկարմ» ՍՊԸ
«Սնեկարմ» ՍՊԸ-ն հիմնադրվել է 2006 թվականին, ընկերությունը զբաղվում է սննդամթերքի, հիմնականում չոր հացի, կարտոֆիլի չիփսերի, եգիպտացորենի ձողիկների և տարբեր տեսակի խմորեղենի արտադրությամբ։ Ընկերությունը ծրագրի սկզբում չուներ կոնկրետ բնապահպանական քաղաքականություն, սակայն ՌԱՄԱ ծրագրի շրջանակներում իրականացվել են մի շարք բնապահպանական/ՌԱՄԱ միջոցառումներ, ինչպիսիք են LED լամպերի օգտագործումը, ջրի խնայողության համար մաքրման համակարգի արդիականացումը, հացի օգտագործումը՝ որպես կենդանիների համար կեր և կեղտաջրերի ուղղակի հոսքից խուսափելու համար արտադրական կեղտաջրերի հավաքը: Այնուամենայնիվ, վերը նշված բոլոր բնապահպանական մոտեցումներն անարդյունավետ են եղել: Ընկերության արտադրանքի նախնական գնահատումից հետո ցանկություն է առաջացել Բնապահպանական քաղաքականության մշակման և որոշ ՌԱՄԱ միջոցառումների իրականացման (արևային ՖՎ վահանակների տեղադրում, պլաստիկ թափոնների վերամշակում), ինչն անշուշտ, կբարձրացնի ընկերության վարկանիշը։ Ավելի էներգաարդյունավետ արտադրության հասնելու շարժառիթով ընկերությունը մասնակցել է ՌԱՄԱ ցուցադրական նախագծին «Կանաչ տնտեսություն Արևելյան գործընկերության տարածաշրջանում» (EAP Green)-ի շրջանակներում (2013-2017): Այս հրապարակումը ցույց է տալիս ընկերության փորձը, որը զեկուցվել է 2021 թվականին իրականացված մոնիտորինգից հետո՝ ծրագրի ավարտից չորս տարի անց:
ՌԱՄԱ գնահատումը ուսումնասիրել է արտադրամասը և հայտնաբերել ՌԱՄԱ հետևյալ միջոցառումները։
ՌԱՄԱ տարբերակ 1: Չոր հացի, խմորեղենի, կարտոֆիլի չիփսերի, քաղցր եգիպտացորենի ձողիկների արտադրության ժամանակ առաջացած կեղտաջրերի համար մաքրման կայան: Արտադրության կեղտաջրերի մաքրում և մաքրված ջրի 20-30%-ի վերաօգտագործում որպես տեխնիկական ջուր (զուգարաններում օգտագործելու, արտաքին տարածքների մաքրման, գործարանին կից փոքրիկ այգու ոռոգման համար): Ջուրը խնայելու համար կպահանջվի համակարգի և սարքավորումների ամբողջական փոխարինում (առաջարկվող կեղտաջրերի մաքրման կայանը ներառում է բազմաֆիլտրման/մշակման փուլեր (աէրոբ, անաէրոբ, ուլտրամանուշակագույն, տեղումներ և այլն): «Սնեկարմ»-ի ներկայացուցիչները պայմանավորվել են ներդրումներ կատարել կեղտաջրերի մաքրման կայանի տեղադրման մեջ՝ բարձրացնելով ընկերության հեղինակությունը։ Ընկերության մոտավոր տնտեսական խնայողությունները կկազմեն տարեկան մոտ 6000 եվրո:
ՌԱՄԱ տարբերակ 2: Վերականգնվող էներգիայի օգտագործում (արևային մարտկոցների տեղադրում): «Սնեկարմ»-ում արտադրական գործընթացը հնարավորություն է տալիս բնական գազի օգտագործումը փոխարինել էլեկտրաէներգիայով։ Միջոցառումը միաժամանակ կլուծի տնտեսական (բնական ռեսուրսների օգտագործման բացառում՝ գազ) և բնապահպանական (ածխաթթու գազի արտանետման կրճատում) խնդիրները։ Նոր ՖՎ համակարգի արտադրած էլեկտրաէներգիան կարող է ծածկել ընկերության էլեկտրաէներգիայի ողջ պահանջարկը, ներառյալ տարածքի լուսավորությունը։
ՌԱՄԱ տարբերակ 3: Պլաստիկ թափոնների վերահսկում: ԵՄ BSB 1138 APRA ծրագրի շրջանակներում պլաստիկ թափոնների հավաքումը և տեղափոխումը պլաստիկ հավաքող ընկերություն: Թափոնների առանձին հավաքման իրականացումը օգուտ կբերի և կբարձրացնի ընկերության վարկանիշը:
